ون ءۇش ادام دەپ وتىرعانىمىز – قاراعاندى قالاسى اكىمىنىڭ بۇرىنعى ورىنباسارلارى ۆيكتور يۆانوۆ پەن سەرگەي گريبەنششيكوۆ, مەملەكەتتىك ساۋلەت-قۇرىلىس باقىلاۋ باسقارماسىنىڭ بۇرىنعى باسشىسى الەكساندر ۆوروبەۆ, وسى مەكەمەنىڭ قىزمەتكەرى بولعان داۋلەت التىنبەكوۆ, اكىمدىك قىزمەتكەرى بولعان تاتيانا گۋك, ساراپشىلار – ۆلاديمير لەتۋنوۆسكي, ابۋل-اميت بايمەنشەەۆ, سەرىك بەكتاەۆ, ولەگ سيپۋن, نۇرقۋات بيسەنوۆ, ستانيسلاۆ يۋرچەنكو, ەۆگەني لازارەۆ, اندرەي ۆيبە.
ەليتالىق تۇرعىن جاي ەسەبىندەگى 60 پاتەرلى تۇرعىن ءۇي كەزىندە حالىققا قىمبات باعاعا ساتىلعان بولاتىن. 2009 جىلى پايدالانۋعا بەرىلگەن ءۇي 2012 جىلدىڭ ءساۋىر ايىندا قۇلاپ قالدى. ءۇيدىڭ ورنالاسقان جەرى وسال, قۇرىلىستىڭ ساپاسى ناشار بولىپ شىقتى. قۇداي ساقتاعاندا, جەرگىلىكتى بيلىك تۇرعىنداردى باسقا جاققا كوشىرىپ ۇلگەردى.
سول كەزدەگى جاي ەرىكسىز ەسكە ورالادى. تۇرعىن ءۇي كەشەنىن سالىپ, پايدالانۋعا بەرگەن – «كارپرومينۆەست» جاۋاپكەرشىلىگى شەكتەۋلى سەرىكتەستىگى. كومپانيا باسشىلارىنىڭ اۋەل باستا ء«بىر جىل ىشىندە كوپ قاباتتى جەتى تۇرعىن ءۇي سالىپ بەرەمىز» دەپ لەپىرگەنىنىڭ ءوزى كۇماندى ەدى. ۇيلەر سالىنىپ جاتقان كەزدە «كارپرومينۆەست» ءوز قۇقىقتارىن باسقا فيرماعا – «سەرۆيسپرومسناب» جشس-نە بەرگەنى دە بەلگىلى. وسى سەرىكتەستىكتىڭ باسشىسى اندرەي ماليانوۆ «بەسوبا» تۇرعىن ءۇي كەشەنىن سالۋ كەزىندە, ياعني 2007-2010 جىلدار ارالىعىندا ۇلەسكەرلەردەن ميلليونداعان تەڭگە قاراجات الىپ, قۇرىلىستى تولىق اياقتاماستان رەسەيگە قاشىپ كەتكەن. ونىڭ ۇستىنەن اسا ءىرى كولەمدە الاياقتىق جاساعانى ءۇشىن قىلمىستىق ءىس قوزعالىپ, حالىقارالىق ىزدەۋ سالىندى. الاياق ماليانوۆتىڭ باسقا دا قۇيتىرقى ىستەرى كوپ. ول باسقارعان كومپانيانىڭ بانككە قارىزى 300 ميلليون تەڭگەدەن اسىپ جىعىلدى. باسپانالى بولسام دەپ, بالا-شاعاسىنىڭ اۋزىنان جىرىپ اقشا جۇمساعان ۇلەسكەرلەر اياق استىنان وسىنداي قيىن جاعدايعا دۋشار بولدى. الايدا كەيىن جەرگىلىكتى بيلىك ەشكىمدى باسپاناسىز قالدىرعان جوق, قالانىڭ باسقا اۋداندارىنان پاتەرلەر ءبولدى.
قاراعاندى قالاسى اكىمدىگىنىڭ تالاپ ارىزىن قاناعاتتاندىرعان قازىبەك بي اتىنداعى اۋداننىڭ سوتى جاۋاپكەر تۇلعالاردى مەملەكەتتىڭ پايداسىنا 597 ميلليون 501 مىڭ تەڭگە تولەۋگە مىندەتتەدى. كەزىندە «بەسوبانى» قابىلداپ العان مەملەكەتتىك كوميسسيانىڭ مۇشەسى بولعان بۇرىنعى شەنەۋنىكتەر ءوز كىناسىن مويىنداماي, سوتتىڭ تالاپ ارىزدى قاناعاتتاندىرماۋىن سۇراعانمەن, ولاردىڭ دەگەنى بولمادى. «قۇرىلىس كورەر كوزگە ءمىنسىز, ساراپشىلاردىڭ تۇجىرىمداماسى وڭ بولدى, ءبىزدىڭ كىنامىز قانشا؟ – دەيدى ولار. – ءۇيدىڭ قۇلاۋىنا تۇرعىن ءۇي كەشەنىن جوبالاۋ بارىسىندا ينجەنەرلىك-گەولوگيالىق جۇمىستاردى دۇرىس جۇرگىزبەگەندەر كىنالى».
ەكس-شەنەۋنىكتەردىڭ اپەللياتسيالىق شاعىمىن وبلىستىق سوت تا قاناعاتتاندىرعان جوق, قازىبەك بي اۋداندىق سوتىنىڭ شەشىمى وزگەرتۋسىز قالدىرىلدى. ەندى ولار كاسساتسيالىق شاعىممەن جوعارعى سوتقا جۇگىنۋگە قۇقىلى. الايدا بۇل ولاردى ءبىرىنشى ينستانتسياداعى سوت شەشىمى بويىنشا مەملەكەت قاراجاتىن قايتارۋدى باستاۋ مىندەتىنەن بوساتپايدى.
قايرات ءابىلدا,
«ەگەمەن قازاقستان»
قاراعاندى
